Madiwani wote kukagua miradi ya Maendeleo ya Halmashauri

Imewekwa: July 17th, 2021

Waziri wa Nchi Ofisi ya Rais Tawala za Mikoa na Serikali za Mitaa Mhe. Ummy Mwalimu  amewataka Madiwani wa Halmashauri zote nchini kabla ya kupitisha bajeti za Halmashauri kuhakikisha wanakagua miradi ya maendeleo  ili kujiridhisha  na utekelezaji wa miradi hiyo.

Akiongea na Madiwani wa Halmashauri ya Manispaa ya Mpanda katika ukumbi wa Manispaa Waziri Ummy Mwalimu amesema madiwani wanao wajibu wa  kusimamia na kutoa ushauri  kwa Halmashauri katika utekelezaji wa Miradi ya Maendeleo.

Amesema kuwa usimamizi wa Halmashauri zote nchini uko chini ya mabaraza ya madiwani, lakini ipo changamoto ya wanaokwenda kukagua miradi ya maendeleo ni kamati ya fedha peke yake, hivyo kuanzia sasa  kabla bajeti haijapatishwa madiwani wote wakakague miradi ya maendeleo.

“Haiwezekani madiwani wachache kwenda kukagua miradi ya maendeleo wakati bajeti ya Halmashauri inapitishwa na madiwani wote, je watajiridhishaje kuwa miradi hiyo imekamilika, hivyo naagiza kunzia sasa madiwani wote wakakague miradi ya maendeleo” amesisitiza Waziri Ummy

Amewataka madiwani hao kuzingatia ushauri unaotolewa na wataalam katika kutekeleza Miradi ya maendeleo hasa sekretarieti ya Mikoa kwa kuwa ndio wenye wajibu wa kuzisimamia, kuzishauri na kutoa maelekezo kwa Mamlaka za Serikali za Mitaa ili kuweza kujenga na kuzistawisha Mamlaka hizo.

Aidha,amewataka madiwani wote nchini kuhakikisha wanasimamia ukusanyaji wa mapato ya ndani na matumizi, pia kuhakikisha zikikusanywa zinapelekwa benki ndani ya masaa 24 na fedha hizo zitumike katika kutatua kero za wananchi