Kamati ya Huduma ya Afya ya Msingi Chamwino Yapewa Maelekezo ya Kudhibiti Corona.

Imewekwa: March 19th, 2020

Kamati ya Huduma ya Afya  ya Msingi  Chamwino Yapewa Maelekezo ya Kudhibiti Corona

Mkuu wa Wilaya ya Chamwino Bibi Vumilia Nyamoga ametoa maelekezo kwa Kamati ya Huduma ya Afya ya Msingi Wilaya ya Chamwino kuhusu kudhibiti na kuchukua tahadhari dhidi ya Ugonjwa wa Corona ( COVID - 19).

Maelekezo haya aliyatoa jana  Machi 18, 2020 alipofanya kikao na Kamati hiyo kwenye Ukumbi wa Mikutano wa Ofisi ya Mkuu wa Wilaya ya Chamwino.

 Maelekezo yaliyotolewa ni kuwa Viongozi wote katika ngazi ya Wilaya , Tarafa, Kata ,Kijiji na Vitongoji  Wahakikishe  wanatoa Elimu kuhusiana na Ugonjwa huu kwa Wananchi, pamoja na kusimamia maelekezo yote yanayotolewa na Serikali kuhusiana na Ugonjwa huu.

 Vile vile amewaelekeza Viongozi wa Taasisi  zikiwemo, Shule na Vituo vya kutolea huduma za Afya , Viongozi wa Dini wahakikishe pia wanatoa Elimu kwa Watu wanaowahudumia na kusimama maelekezo  yote yanayotolewa na Serikali kuhusiana na Ugonjwa huu, ikiwa ni pamoja na kuhimiza suala la  kunawa Mikono kwa kutumia maji safi tiririka na sabuni. Pia amesema kila mmoja kwa Imani yake amuombe Mungu ili Ugonjwa huu usifikie hatua ya kuondoa uhai wa ndugu zetu.

“ Kila Taasisi iweke  maji safi tiririka na sabuni kwa ajili ya kunawa Mikono  na Ofisi ya Mkuu wa Wilaya  na Mkurugenzi watashirikiana kuahakikisha kila Taasisi inatekeleza Maagizo haya yote. “

Aidha ameelekeza kuwa Wananchi waepuke Mikusanyiko ambayo siyo ya lazima ili kujikinga na maambukizi.

Mkuu wa Wilaya ameelekeza pia wamiliki wa vyombo vya Usafiri kama daladala wanunue dawa za kutakasa mikono kuhakikisha wanawapaka  abiria kabla   ya kuingia kwenye  vyombo vyao vya usafiri  na wakati wa kushuka pia  na hivyo hivyo  ifanyike kwa  wamiliki wa Nyumba za kulala wageni  kwa wageni wanaolala kwenye  nyumba zao.

Amewataka wamiliki wa Nyumba za kulala wageni  wafuatilie  na kutoa taarifa iwapo atatokea Mgonjwa  mwenye ugonjwa wa Corona (COVID - 19) .Aliongeza  kuwa kuna umuhimu wa kufanya uhakiki wa wageni wote wanaoingia katika nyumba zao  za kulala wageni na kuendelea  kuwahimiza kujikinga kwa wale ambao wako salama.

Aidha Mkuu wa Wilaya ametoa rai kwa Watendaji wa Kata,Vijiji na Maafisa Tarafa  kusimamia  maelekezo yote yaliyotolea na kutoa taarifa katika ngazi ya Wilaya  kila Wiki na muda wowote zitakapohitajika  na aliomba kila mmoja kuona wajibu wa kutoa taarifa pale inapohitajika.

 Mwisho aliomba wadau watakaoguswa wasaidie kutoa mahitaji yanayohitajika katika kuhudumia  wagonjwa wa Ugonjwa huu iwapo watagundulika.

Aliwashukuru Kampuni ya “YAPI MARKEZ” kwa kutoa mabango yanayoelimisha  kuhusu ugonjwa wa Corona.