Dabalo Yaichapa Itiso Bonanza Uchaguzi Serikali Za Mitaa

Imewekwa: November 15th, 2024

Mchezo wa kirafiki kati ya timu ya Dabalo FC na Itiso FC ulimalizika kwa timu ya Dabalo kuibuka na ushindi wa magoli 2-1 dhidi ya Itiso, mchezo huo wa bonanza kuelekea uchaguzi wa Serikali za mitaa Novemba 27 ulichezwa katika uwanja wa shule ya msingi Dabalo, kata ya Dabalo Halmashauri ya Wilaya ya Chamwino.

Akizungumza kabla ya kuanza kwa mtanange huo Afisa Tarafa wa Tarafa ya Itiso Ndg. Japhary Kikoti ambaye alimuwakilisha mkuu wa Wilaya ya Chamwino Mh. Janeth Mayanja aliwahasa wananchi waliojitokeza kiwanjani hapo kujitokeza kwa wingi siku ya Jumatano ya tarehe 27 Novemba 2024 kuchagua viongozi wa ngazi ya kijiji na kitongoji ili waweze kupata haki yao ya msingi.

Katika mchezo huo timu ya Dabalo ilipata  seti ya jezi mpya kama zawadi ya ushindi katika mchezo huo na zawadi ya mpira mpya kwa timu ya Itiso.

Bonanza hilo lilishudiwa na mashabiki lukuki ambalo lilibeba ujumbe wa kuhamasisha wananchi wote waliojiandikisha katika daftari la mpiga kura uchaguzi wa Serikali za mitaa kujitokeza kupiga kura siku ya tarehe 27 Novemba 2024 ili kuchagua Mwenyekiti wa kijiji, Mwenyekiti wa kitongoji, wajumbe wa Halmashauri ya kijiji kundi mchanganyiko pamoja na wajumbe wa Halmashauri ya kijiji kundi maalum (wanawake).

Serikali za Mitaa Sauti ya Wananchi, Jitokeze Kushiriki Uchaguzi.