OFISI YA DC CHAMWINO YASHIRIKIANA NA DIWANI KUTIMIZA AHADI KWA MTOTO ANAESOMA KWENYE MAZINGIRA MAGUMU

Imewekwa: July 9th, 2019

Itakumbukwa kuwa tarehe 15.06.2019 Chamwino iliadhimisha siku ya MTOTO WA AFRIKA kiwilaya kwenye viwanja vya shule ya msingi Buigiri Blind.

Katika maadhimisho hayo Mgeni Rasmi Bwana Lucas Manyala kwa niaba ya Mkuu wa Wilaya na Diwani wa Kata ya Buigiri Mheshimiwa Kenneth Yindi waliahidi kushirikiana kumnunulia Baiskeli Mwanafunzi Josephine Ngali baada ya kusimulia adha anazokumbana nazo kwa kusoma umbali mrefu.

Baiskeli hiyo imekabidhiwa tarehe 6.7.2019 nyumbani kwa walezi wa Josephine katika kijiji cha Nzali.

Akizungumza baada ya kukabidhi baiskeli hiyo, Mratibu wa Dawati la Maendeleo ya Mtoto Wilaya ya Chamwino Bi. Sophia Swai amesisitiza kuwa baiskeli hiyo itunzwe na itumike katika lengo lililokusudiwa na kumtaka Josephine kusoma kwa bidii. Nao walezi wa Josephine wameishukuru ofisi ya Mkuu wa Wilaya ya Chamwino na Mh. Diwani Yindi kwa msaada huo.

Kwa upande mwingine Bi. Sophia Swai amekabidhi godoro lililonunuliwa na Afisa Maendeleo ya Jamii Asha Shame kwa mtoto Joyce Yared anaishi katika mazingira magumu.

Katika makabidhiano hayo Mratibu wa Dawati la Maendeleo ya Mtoto aliambatana na Joyce Elia Balozi wa Watoto Wahanga wa Unyaswaji pamoja na Mary Aiwina kutoka Ofisi ya Waziri Mkuu.