NMB yakabidhi madawati 255 kwa Mbunge wa Chamwino

Imewekwa: May 5th, 2021

Bank ya NMB kanda ya kati imemkabidhi Mbunge wa chamwino msaada wa Madawati yapatayo 255 kwa shule za msingi za Dabalo, Chiwondo na Igamba kata ya Dabalo na Shule ya msingi Msanga B na Sekondari ya Msanga Kata ya Msanga.

Hafla hiyo ya kukabidhi madawati hayo imefanyika May 5, 2021 katika viwanja vya shule ya Msingi Dabalo na kuhudhuriwa na viongozi mbalimbali wa Chama na Serikali Wilayani Chamwino.

Akizungumza katika makabidhiano hayo Meneja wa NMB kanda ya Kati Bw. Msolo Mlozi amesema kuwa msaada huo ni sehemu ya kurudisha shukrani kwa jamii baada ya bank ya NMB kupata faida hivyo sehemu ya faida hiyo hugawana na Wananchi.

Akibainisha nyanja mbalimbali ambazo Bank ya NMB hutoa gawio lake kama faida kwa Wananchi, Bw. Mlozi amezitaja nyanja hizo ni pamoja na Elimu, Majanga, huduma za Afya pamoja na kutoa elimu juu ya utunzaji fedha.

Naye Mbunge wa Jimbo la Chamwino, ambaye ni Naibu Waziri Ofisi ya Rais Menejimenti ya Utumishi wa Umma na Utawala Bora Mhe. Deo Ndejembi ameishukuru Bank ya NMB kwa msaada huo kwani kwa kiasi kikubwa imepunguza tatizo la upungufu wa madawati kwa kata ya Dabalo.

Naibu Waziri Ndejembi amewataka wanafunzi walionufaika na msaada huo kuyatunza madawati hayo iliyaweze kutumika kwa muda mrefu, kwani kutawezesha na wengine kuyatumia.

Akitoa shukrani kwa niaba ya Halmashauri ya Chamwino Makamu Mwenyekiti Mhe. Kenneth Yindi ametoa pongezi kwa Bank ya NMB kwa namna ambavyo wamekuwa mstari wa mbele katika kuisaidia jamii hasa katika nyanja za Elimu kwani kwakufanya hivyo kunatengeneza wasomi wazuri wa siku za usoni.