Handali Bingwa Bonanza la Hamasa Kupiga Kura Uchaguzi Serikali Za Mitaa

Imewekwa: November 19th, 2024

Timu ya Handali imeibuka na ubingwa wa jezi mpya baada ya kuifunga timu ya Mvumi Mission kwa changamoto ya mikwaju ya penati 5 kwa 4 baada ya timu hizo kutoshana nguvu ndani ya dakika 90 kwa kutoka sare ya goli 1-1.

Mchezo huo ni kati ya michezo ya bonanza inayoendelea katika Halmashauri ya Wilaya ya Chamwino katika Tarafa zote yenye lengo la kuhamasisha wananchi wote waliojiandikisha katika daftari la kupiga kura uchaguzi wa Serikali za mitaa wanajitokeza siku ya Jumatano ya tarehe 27 Novemba, 2024 kupiga kura kuchagua viongozi wa ngazi ya kijiji na kitongoji.

Handali walishinda ubingwa huo kwenye mchezo uliopigwa katika uwanja wa shule ya msingi Mvumi Mission kata ya Mvumi Mission baada ya wenyeji kuanza kupata goli kabla ya Handali kusawazisha dakika za jioni na kupelekea mchezo huo kwenda kwenye mikwaju ya penati na kushuhudia timu mwenyeji ya Mvumi Mission ikikamata nafasi ya pili na kuondoka na zawadi ya mpira mpya.

Bi. Norma Matonya Mtendaji wa kata ya Mvumi Mission aliongoza zoezi la ugawaji wa zawadi kwa timu hizo pamoja na kuwahasa wananchi wote wenye sifa ya kupiga kura kujitokeza tarehe 27 Novemba kupiga kura kuchagua viongozi wao wa kijiji na kitongoji.  

Serikali za Mitaa Sauti ya Wananchi, Jitokeze Kushiriki Uchaguzi.